សម្តេចតេជោ ហ៊ុន សែន រិះគន់សារព័ត៌មានថៃ៖ «ពេលខ្ញុំកាន់អំណាច អ្នកឯងមិនទាន់កើតទេ!»

ប្រធានព្រឹទ្ធសភាកម្ពុជា សម្តេច ហ៊ុន សែន បានផ្តល់ដំបូន្មានជាសាធារណៈដល់ The Nation Thailand នៅថ្ងៃទី២៣ ខែតុលា ដោយរិះគន់ការរាយការណ៍ថ្មីៗរបស់សារព័ត៌មាននេះអំពីកម្ពុជាថា ខ្វះវិជ្ជាជីវៈ និងណែនាំឱ្យ «យកចិត្តទុកដាក់កិច្ចការផ្ទៃក្នុងថៃជាមុន» ជាជាងធ្វើការសន្និដ្ឋានតាមចិត្តអំពីនយោបាយកម្ពុជា។ សម្តេចតេជោ ហ៊ុន សែន បានសរសេរលើបណ្តាញសង្គមថា «ខ្ញុំណែនាំឱ្យពួកគេមើលអ្វីដែលកំពុងកើតឡើងនៅក្នុងប្រទេសថៃឱ្យច្រើន ជាជាងចំណាយពេលទស្សន៍ទាយអនាគតនយោបាយកម្ពុជា»។ សម្តេចបាននិយាយបែបកំប្លែងថា សម្តេចបានកាន់អំណាចតាំងពីពេលអ្នកកាសែតថៃមួយចំនួនមិនទាន់កើត ឬនៅតែ «រត់លេងទាំងអាក្រាតកាយ» ហើយមានការយល់ដឹងជ្រាលជ្រៅអំពីនយោបាយកម្ពុជា។ «អ្នកកាសែតថៃខ្លះមិនទាំងយល់ស្ថានភាពប្រទេសខ្លួនឯងផង ប៉ុន្តែបែរជាព្យាយាមអត្ថាធិប្បាយស្ថានការណ៍នយោបាយកម្ពុជា»។ សម្តេចតេជោក៏បានរំលឹកសារព័ត៌មានថៃឱ្យតាមដានយ៉ាងដិតដល់នូវការវិវត្តរបស់រដ្ឋាភិបាលថៃ ក្រោយការរំលាយសភា និងការបោះឆ្នោតមុនអាណត្តិក្នុងឆ្នាំ២០២៦ ដោយថា «នោះទើបជារឿងដែលពួកគេពិតជាគួរយកចិត្តទុកដាក់»។ សម្តេចបានសង្កត់ធ្ងន់ថា «ចំពោះកម្ពុជា យើងមានសមត្ថភាពគ្រប់គ្រងកិច្ចការខ្លួនឯង។ មិនចាំបាច់យករឿងផ្ទៃក្នុងថៃមកប្រឌិតជាព័ត៌មានអំពីកម្ពុជាទេ»។ នៅចុងក្រោយ សម្តេចតេជោបានបញ្ចប់មតិរបស់សម្តេចថា «ចង់លេង កុំខឹង បើខឹង កុំលេង»។ ស្ថានីយចងក្រងសេចក្តីរាយការណ៍