នគរបាលសិង្ហបុរីតាមរកជនសង្ស័យសិង្ហបុរីនិងម៉ាឡេស៊ី៣៤នាក់ ពាក់ព័ន្ធបណ្ដាញឆបោក

នគរបាលសិង្ហបុរីបានចេញសេចក្ដីជូនដំណឹងនៅថ្ងៃទី២៩ តុលា តាមរកជនសង្ស័យសិង្ហបុរីនិងម៉ាឡេស៊ី៣៤នាក់ ដែលសង្ស័យចូលរួមក្នុងបណ្ដាញឆបោកនៅកម្ពុជា។ នគរបាលថា ក្រុមនេះក្លែងខ្លួនជាមន្ត្រីរដ្ឋាភិបាល ពាក់ព័ន្ធយ៉ាងតិច៤៣៨ករណី និងបណ្ដាលឱ្យពលរដ្ឋសិង្ហបុរីខាតបង់៤១លានដុល្លារសិង្ហបុរី ឬប្រមាណ២១៩លានយ័ន។ ក្នុងចំណោមអ្នកត្រូវតាមរក មានពលរដ្ឋសិង្ហបុរី២៧នាក់ និងពលរដ្ឋម៉ាឡេស៊ី៧នាក់។ នគរបាលថា ពួកគេធ្វើសកម្មភាពនៅក្រៅប្រទេស ហើយកំពុងសហការតាមរយៈអង្គការនគរបាលអន្តរជាតិ និងស្ថាប័នអនុវត្តច្បាប់នៃប្រទេសនានា ដើម្បីតាមរក។ កាលពីថ្ងៃទី៩ កញ្ញា នគរបាលសិង្ហបុរីបានសហការជាមួយនគរបាលជាតិកម្ពុជា ឆ្មក់ចូលមូលដ្ឋានសង្ស័យឆបោកនៅភ្នំពេញ។ ជនសង្ស័យ១៥នាក់ត្រូវបានចាប់ខ្លួន រួមមានជនជាតិសិង្ហបុរី១២នាក់ ម៉ាឡេស៊ី២នាក់ និងហ្វីលីពីនម្នាក់។ អត្ថបទថា ពួកគេត្រូវបានចោទប្រកាន់នៅថ្ងៃទី១១ និង១២ កញ្ញា ពីបទចូលជាសមាជិកក្រុមឧក្រិដ្ឋកម្មមានការចាត់តាំងដែលមានទំនាក់ទំនងក្នុងប្រទេស។ នគរបាលថា ការស៊ើបអង្កេតបន្ត និងភស្តុតាងពីកម្ពុជា បានរកឃើញជនជាតិសិង្ហបុរី២៧នាក់ និងម៉ាឡេស៊ី៧នាក់បន្ថែមទៀត ដែលសង្ស័យជាក្រុមតែមួយ និងធ្វើសកម្មភាពឆបោកនៅមូលដ្ឋានដូចគ្នា។ នគរបាលសិង្ហបុរីថា នឹងបន្តតាមចាប់អ្នកប្រព្រឹត្តបទល្មើសលើពលរដ្ឋសិង្ហបុរី មិនថាធ្វើសកម្មភាពនៅក្នុងឬក្រៅប្រទេសឡើយ និងអំពាវនាវឱ្យសាធារណជនផ្ដល់ព័ត៌មាន។ អ្នកដឹងព័ត៌មានអាចទូរស័ព្ទទៅលេខ១៨០០-២៥៥-០០០០ ឬពីក្រៅប្រទេសទៅលេខ+៦៥ ៦២៥៥ ០០០០ ឬផ្ដល់ព័ត៌មានដោយអនាមិកតាមអនឡាញ។ នគរបាលធានារក្សាព័ត៌មានជាសម្ងាត់យ៉ាងតឹងរ៉ឹង។ ស្ថានីយយើងចងក្រងពីប្រភពព័ត៌មាន។