{"asset":"news","key":"5935","locale":"km","id":"news:5935:km","entityId":"news:5935","canonicalUrl":"https://www.kps-tv.com/km/news/detail/5935","state":"ready","title":"វត្ថុបុរាណខ្មែរ២០រូបត្រូវបានបញ្ជូនត្រឡប់មកកម្ពុជាវិញដោយជោគជ័យ","summary":"ក្រសួងវប្បធម៌ និងវិចិត្រសិល្បៈ បានប្រកាសពីការបញ្ជូនវត្ថុបុរាណខ្មែរ២០មកកម្ពុជាវិញ តាមរយៈការចរចាជាមួយអ្នកប្រមូលឯកជននៅអាស៊ី។","body":"សមិទ្ធផលដ៏ធំធេងថ្មីមួយទៀត គឺការបញ្ជូនវត្ថុបុរាណខ្មែរចំនួន២០រូបត្រឡប់មកកម្ពុជាវិញដោយជោគជ័យ។ បើតាមក្រសួងវប្បធម៌ និងវិចិត្រសិល្បៈ ការបញ្ជូនវត្ថុបុរាណខ្មែរនេះ គឺទាមទារបានពីអ្នកកាន់កាប់សមុច្ច័យឯកជនមួយនៅតំបន់អាស៊ី។ នេះសបញ្ជាក់ពីកិច្ចខិតខំប្រឹងប្រែងជាប្រចាំរបស់កម្ពុជា ក្នុងការទាមទារ និងស្តារឡើងវិញនូវមរតកវប្បធម៌ដូនតាសម្រាប់កូនចៅជំនាន់ក្រោយ។ \nក្នុងសេចក្តីប្រកាសព័ត៌មាននៅថ្ងៃទី០៦ ខែមេសា ក្រសួងវប្បធម៌ បានបង្ហាញពីដំណើរការទាមទារដែលអាចសម្រេចទៅបាន ដោយសារមានការចូលរួមជ្រោមជ្រែងពីអ្នកជំនាញនៃក្រុមការងារស្រាវជ្រាវដែលបានផ្តល់ប្រឹក្សា និងរៀបចំការចរចារហូតឈានដល់ការប្រគល់វត្ថុទាំងនេះមកកម្ពុជាវិញ។ បុគ្គលស្នូលក្នុងកិច្ចការនេះ គឺលោក Imran Hamid Khwaja ជាដៃគូនៃក្រុមហ៊ុន Tan Rajah & Cheah ដែលជាក្រុមហ៊ុនច្បាប់ ដ៏ចំណាស់បំផុតមួយរបស់ប្រទេសសិង្ហបុរី និងជាមេធាវីដែលមានបទពិសោធន៍ទូលំទូលាយក្នុងការដោះស្រាយវិវាទ អន្តរជាតិ។ លោក Khwaja និងលោក Bradley J. Gordon នៃក្រុមហ៊ុន Edenbridge Asia បានដើរតួនាទី យ៉ាងសំខាន់ក្នុងការសហការ និងចរចាបញ្ជូនត្រឡប់មកវិញនៃរតនវត្ថុជាតិទាំងនេះ។\nក្រសួងវប្បធម៌ បញ្ជាក់បន្ថែមថា សមុច្ច័យដែលបានប្រគល់មកវិញមានលក្ខណៈចម្រុះសាងពីថ្មភក់ និងសំរឹទ្ធ ដូចជា រូបបដិមាសម័យបាយ័ន ដែលគេជឿថាមានប្រភពដើមមកពីក្រុងអង្គរធំ។ សម្បត្តិវប្បធម៌ទាំងនេះមិនត្រឹមតែជាវត្ថុសិល្បៈទេ តែជាសាក្សីរស់ នៃបញ្ញាញាណរបស់បុព្វបុរស និងដួងព្រលឹងនៃអរិយធម៌ខ្មែរ ដែលនឹងផ្ដល់ការយល់ដឹងបន្ថែមអំពីប្រវត្តិសាស្ត្រកម្ពុជា។\nទន្ទឹមគ្នានេះ ការប្រគល់មកវិញនូវវត្ថុបុរាណទាំងនេះ ក៏បានសបញ្ជាក់យ៉ាងច្បាស់ពីការប្តេជ្ញាចិត្តរបស់កម្ពុជា ក្នុងការបន្តស្វែងរកយុត្តិធម៌សម្រាប់បេតិកភណ្ឌវប្បធម៌របស់ខ្លួន។ កម្ពុជាមានក្តីរំភើបចំពោះការវិលត្រឡប់មកវិញនៃព្រលឹងដូនតាខ្មែរមកកាន់មាតុភូមិកំណើត។ សមិទ្ធផលនេះ បានបញ្ជូនសារយ៉ាងច្បាស់ថា ប្រជាជនកម្ពុជាបន្តរួបរួមគ្នាជាធ្លុងមួយក្នុងការ ការពារមរតកវប្បធម៌របស់ខ្លួនសម្រាប់មនុស្សជាតិទាំងមូល។\nជាមួយគ្នានេះ ក្រសួងវប្បធម៌ បានអំពាវនាវនិងលើកទឹកចិត្តដល់សារមន្ទីរ និងអ្នកប្រមូលសមុច្ច័យឯនជននានាដែលកំពុងកាន់កាប់វត្ថុបុរាណខ្មែរ សូមទាក់ទងមកក្រសួង និងចូលរួមពិភាក្សាប្រកបដោយវិជ្ជាជីវៈក្នុងការប្រគល់វត្ថុបុរាណខ្មែរមកកម្ពុជាវិញ៕\nដោយ៖ ង៉ែត ពិសាន្ត","contentScope":"full","proof":{"publishedSourceRevision":"1","publishedWorkingVersionId":"14249","languageVersionId":"8828","visibilityVersion":"2","versionToken":"a1.yVPHmkEWEIKoXT0DmaqXLzwT5A8QHEWh1EmTpcY07HY"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-04-07T06:50:07Z"}