នៅព្រឹកថ្ងៃទី២១ ខែតុលា អភិបាលខេត្តព្រះសីហនុ លោក ម៉ាង ស៊ីណេត បានជួបដោយឡែកជាបន្តបន្ទាប់នៅទីក្រុងសៀងហៃ ប្រទេសចិន ជាមួយគណៈប្រតិភូក្រុមហ៊ុន Shanghai Ensikai Investment (Group) Co., Ltd. និងក្រុមហ៊ុន Zhong’ang Technology Co., Ltd.។ ភាគីទាំងពីរបានពិភាក្សាលម្អិតអំពីការវិនិយោគឧស្សាហកម្ម និងកិច្ចសហប្រតិបត្តិការវិស័យយានយន្តថាមពលថ្មី។
លោក ម៉ាង ស៊ីណេត បានបញ្ជាក់ថា ខេត្តព្រះសីហនុកំពុងជំរុញពិពិធកម្មឧស្សាហកម្ម និងការអភិវឌ្ឍថាមពលថ្មី ហើយស្វាគមន៍សហគ្រាសចិនឱ្យមកវិនិយោគកាន់តែច្រើន។ រដ្ឋបាលខេត្តនឹងបន្តកែលម្អបរិយាកាសធុរកិច្ច និងផ្តល់សេវាប្រកបដោយប្រសិទ្ធភាព តម្លាភាព និងភាពងាយស្រួល ដើម្បីជួយសហគ្រាសកម្ពុជា និងចិនសម្រេចផលប្រយោជន៍ទៅវិញទៅមក។
ពេលជួបក្រុមហ៊ុន Shanghai Ensikai Investment Group តំណាងក្រុមហ៊ុនបានណែនាំពីសកម្មភាពរបស់ខ្លួនក្នុងការផលិតគ្រឿងម៉ាស៊ីន ការវិនិយោគឧស្សាហកម្មប្រកបដោយចីរភាព និងការរួមបញ្ចូលខ្សែសង្វាក់ឧស្សាហកម្ម។ ក្រុមហ៊ុនមានបំណងស្វែងយល់បន្ថែមពីបរិយាកាសវិនិយោគ និងសក្តានុពលអភិវឌ្ឍន៍របស់កម្ពុជា ជាពិសេសខេត្តព្រះសីហនុ។
បន្ទាប់មក លោក ម៉ាង ស៊ីណេត បានជួបគណៈប្រតិភូក្រុមហ៊ុន Zhong’ang Technology។ ក្រុមហ៊ុននេះជាក្រុមហ៊ុនផលិតយានយន្តអគ្គិសនីធំមួយ ដែលផ្តោតលើការស្រាវជ្រាវ អភិវឌ្ឍ និងផលិតយានយន្តកង់បីអគ្គិសនី ឧបករណ៍បំភ្លឺ និងយានយន្តប្រើប្រាស់ពិសេស។ តំណាងក្រុមហ៊ុនបានបញ្ជាក់ថា មានផែនការទៅសិក្សាទីផ្សារនៅកម្ពុជា និងវាយតម្លៃលទ្ធភាពវិនិយោគសាងសង់រោងចក្រនៅខេត្តព្រះសីហនុ។
សេចក្តីរាយការណ៍សរុបដោយស្ថានីយយើង
