នៅព្រឹកថ្ងៃទី២២ ខែតុលា ឯកឧត្តម ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានដឹកនាំគណៈប្រតិភូជាន់ខ្ពស់នៃកងយោធពលខេមរភូមិន្ទ ទៅដល់ទីក្រុងកូឡាឡាំពួរ ដើម្បីចូលរួមកិច្ចប្រជុំវិសាមញ្ញលើកទី២ របស់គណៈកម្មាធិការព្រំដែនទូទៅកម្ពុជា-ថៃ (GBC) នៅថ្ងៃទី២៣ ខែតុលា។
នៅអាកាសយានដ្ឋានអន្តរជាតិកូឡាឡាំពួរ គណៈប្រតិភូទទួលការស្វាគមន៍ពីមន្ត្រីជាន់ខ្ពស់ក្រសួងការពារជាតិម៉ាឡេស៊ី និងមន្ត្រីការទូតកម្ពុជា រួមមានលោកឧត្តមនាវីទោ Ahmad Shafirudin Bin Abu Bakar ជំនួយការនាយសេនាធិការទទួលបន្ទុកផែនការ អភិវឌ្ឍន៍ និងយុទ្ធសាស្ត្រ ព្រមទាំងឯកអគ្គរាជទូត និងអនុព័ន្ធយោធាកម្ពុជាប្រចាំម៉ាឡេស៊ី។
ឯកឧត្តម ទៀ សីហា បានបង្ហាញក្តីរំពឹងថា កិច្ចប្រជុំនឹងប្រព្រឹត្តទៅក្នុងបរិយាកាសមិត្តភាព និងស្ថាបនា ដោយផ្តោតលើបញ្ហាសំខាន់ៗ ដូចជាការអនុវត្តកិច្ចព្រមព្រៀងមុនៗឱ្យបានម៉ឺងម៉ាត់ និងការដកអាវុធធុនធ្ងន់ក្រោមការសង្កេតរបស់អ្នកសង្កេតការណ៍អាស៊ាន។
កិច្ចប្រជុំក៏នឹងពិភាក្សាអំពីការបោសសម្អាតមីនមនុស្សធម៌ និងកិច្ចសហប្រតិបត្តិការប្រឆាំងការឆបោកតាមប្រព័ន្ធអនឡាញ ការរត់ពន្ធគ្រឿងញៀន និងការជួញដូរមនុស្ស។
ភាគីកម្ពុជាសង្ឃឹមថា កិច្ចប្រជុំនឹងទទួលបានលទ្ធផលវិជ្ជមាន ពង្រឹងសន្តិភាព និងកិច្ចសហប្រតិបត្តិការតាមព្រំដែន ហើយជួយឱ្យស្ថានការណ៍វិលទៅរកប្រក្រតីភាពវិញ។
ស្ថានីយយើងខ្ញុំចងក្រងពីប្រភពព័ត៌មាននានា។
