ក្រសួងការបរទេស និងសហប្រតិបត្តិការអន្តរជាតិកម្ពុជាបានចេញសេចក្តីថ្លែងការណ៍នៅថ្ងៃទី២៤ ខែតុលា ដោយបញ្ជាក់ឡើងវិញពីការប្តេជ្ញាចិត្តយ៉ាងមុតមាំរបស់រដ្ឋាភិបាលក្នុងការប្រយុទ្ធប្រឆាំងឧក្រិដ្ឋកម្មឆ្លងដែនគ្រប់ទម្រង់ រួមមានការឆបោកតាមអនឡាញ ការជួញដូរមនុស្ស និងបទល្មើសបច្ចេកវិទ្យាផ្សេងទៀត ហើយប្តេជ្ញាការពារសុវត្ថិភាព សេចក្តីថ្លៃថ្នូរ និងសុខុមាលភាពសង្គមរបស់ប្រជាជន។
សេចក្តីថ្លែងការណ៍បានបញ្ជាក់ថា ក្នុងរយៈពេល២ឆ្នាំកន្លងមក កម្ពុជាបានបន្តប្រតិបត្តិការបង្ក្រាបទូទាំងប្រទេស រកឃើញ និងរំលាយក្រុមឆបោកតាមអនឡាញជាច្រើន និងចាត់ការតាមច្បាប់ចំពោះអ្នកពាក់ព័ន្ធ។ «កិច្ចខិតខំទាំងនេះរួមមានការពង្រឹងការអនុវត្តច្បាប់ប្រឆាំងការជួញដូរមនុស្ស បទល្មើសបច្ចេកវិទ្យា ការឆបោក និងការលាងលុយកខ្វក់»។
រដ្ឋាភិបាលបានចាត់វិធានការរដ្ឋបាលជាបន្តបន្ទាប់ រួមមានដកហូតអាជ្ញាបណ្ណអាជីវកម្មរបស់ក្រុមហ៊ុន១២០ បិទគេហទំព័រល្បែងស៊ីសងជាង១០០០ និងបង្កកគណនីខុសច្បាប់ដែលពាក់ព័ន្ធការឆបោកឌីជីថល។ ស្ថាប័នអនុវត្តច្បាប់ក៏បានធ្វើប្រតិបត្តិការចំគោលដៅទូទាំងប្រទេស បិទតំបន់ខុសច្បាប់ជាច្រើន ចាប់ខ្លួនជនសង្ស័យរាប់រយនាក់ និងសង្គ្រោះជនរងគ្រោះ។
សេចក្តីថ្លែងការណ៍ក៏បានបង្ហាញថា កម្ពុជាកំពុងបង្កើតក្រុមការងារជាតិទទួលបន្ទុកបទល្មើសបច្ចេកវិទ្យា បង្កើនសមត្ថភាពកោសល្យវិច័យឌីជីថល និងសហការជាមួយប្រទេសជាច្រើន ដើម្បីពង្រឹងការអនុវត្តច្បាប់ឆ្លងដែន និងប្រព័ន្ធអភិបាលកិច្ចបណ្តាញ។
សេចក្តីថ្លែងការណ៍បាននិយាយថា «សមិទ្ធផលទាំងនេះបង្ហាញពីការប្តេជ្ញាចិត្តយ៉ាងមុតមាំរបស់កម្ពុជាក្នុងការលុបបំបាត់បទល្មើសបច្ចេកវិទ្យា ការពារសុវត្ថិភាពឌីជីថល និងជំរុញការអភិវឌ្ឍប្រកបដោយសុខភាពល្អនៃលំហបណ្តាញតំបន់»។
ភាគីកម្ពុជាក៏បានសហការយ៉ាងសកម្មជាមួយដៃគូតំបន់ និងអន្តរជាតិ រួមមានកូរ៉េខាងត្បូង ចិន និងរដ្ឋសមាជិកអាស៊ាន តាមរយៈការស៊ើបអង្កេតរួម ការចែករំលែកព័ត៌មានសម្ងាត់ និងជំនួយផ្លូវច្បាប់ទៅវិញទៅមក។ កិច្ចខិតខំទាំងនេះបានរំលាយបណ្តាញឆបោកធំៗជាច្រើន នាំឱ្យមានការចោទប្រកាន់មេក្លោងឧក្រិដ្ឋកម្ម និងជួយបញ្ជូនជនរងគ្រោះពីប្រទេសជាច្រើនត្រឡប់មាតុភូមិ។
តាមទិន្នន័យរបស់គណៈកម្មការពិសេសប្រឆាំងការឆបោកតាមអនឡាញកម្ពុជា ក្នុងរយៈពេលត្រឹមតែ៤ខែកន្លងមកនេះ ជនសង្ស័យឆបោកតាមអនឡាញ៣៤៥៥នាក់មកពី២០ប្រទេស ត្រូវបានចាប់ខ្លួននៅទូទាំងប្រទេស។
ស្ថានីយចងក្រងសេចក្តីរាយការណ៍