Prince Holding Group នៅកម្ពុជាបានផ្សព្វផ្សាយសេចក្តីថ្លែងការណ៍ផ្លូវការលើគេហទំព័រខ្លួននៅថ្ងៃទី១១ ខែវិច្ឆិកា ឆ្នាំ២០២៥ បដិសេធយ៉ាងខ្លាំងចំពោះការចោទថាក្រុមហ៊ុន និងប្រធាន Chen Zhi ពាក់ព័ន្ធការឆបោក ដោយថាការចោទទាំងនោះ ‘គ្មានមូលដ្ឋាន និងមិនពិតទាំងស្រុង’។
សេចក្តីថ្លែងការណ៍ថា សារព័ត៌មាន និងបុគ្គលមួយចំនួនផ្សព្វផ្សាយពាក្យមិនពិត បំភ្លៃអង្គហេតុ និងធ្វើឱ្យសាធារណជនភាន់ច្រឡំ ដើម្បីរកលេសឱ្យការបង្កក ឬរឹបអូសទ្រព្យសម្បត្តិរាប់ពាន់លានដុល្លារ ដែលក្រុមហ៊ុនចាត់ទុកថាខុសច្បាប់។ Prince Group ថាការចោទប្រកាន់ និងសេចក្តីរាយការណ៍គ្មានការបញ្ជាក់បានប៉ះពាល់ធ្ងន់ដល់កេរ្តិ៍ឈ្មោះ បុគ្គលិករាប់ពាន់នាក់ ដៃគូ និងសហគមន៍ដែលខ្លួនបម្រើ។
Prince Holding Group បញ្ជាក់ឡើងវិញថា ចាប់តាំងពីបង្កើតមក ខ្លួនប្រកាន់ខ្ជាប់ភាពស្មោះត្រង់ និងអនុវត្តតាមច្បាប់ ប្រតិបត្តិការដោយតម្លាភាពនៅកម្ពុជា និងអាស៊ីអាគ្នេយ៍។ សេចក្តីថ្លែងការណ៍ថា ក្រុមហ៊ុន និង Chen Zhi មិនធ្លាប់ពាក់ព័ន្ធសកម្មភាពខុសច្បាប់ណាមួយ ហើយការចោទទាំងអស់ខ្វះអង្គហេតុ និងភស្តុតាងគាំទ្រ។
ដើម្បីការពារសិទ្ធិ ក្រុមហ៊ុនថាបានជួលក្រុមហ៊ុនមេធាវីអន្តរជាតិ Boies Schiller Flexner LLP ដោះស្រាយបញ្ហាច្បាប់ពាក់ព័ន្ធ។ ក្រុមហ៊ុនថានឹងប្រើមធ្យោបាយច្បាប់ការពារកេរ្តិ៍ឈ្មោះ ហើយពេលការពិតលេចចេញ សាធារណជននឹងឃើញភាពគ្មានកំហុសរបស់ក្រុមហ៊ុន និងប្រធាន។
ព័ត៌មានសរុប។
