កម្ពុជាចូលរួមកិច្ចប្រជុំអន្តរជាតិ ដើម្បីសហការប្រឆាំងការឆបោក

ថ្លែងក្នុងកិច្ចប្រជុំអន្តរជាតិមួយនៅទីក្រុងតូក្យូម្សិលមិញ អគ្គស្នងការទីភ្នាក់ងារនគរបាលជាតិជប៉ុន Yoshinobu Kusunoki បានថ្លែងថា ការសហការនិងការឆ្លើយតបរហ័សរវាងប្រទេសពាក់ព័ន្ធមានសារៈសំខាន់ខ្លាំង ដើម្បីពង្រឹងការប្រយុទ្ធប្រឆាំងក្រុមឆបោកដែលមានមូលដ្ឋាននៅក្រៅប្រទេស។

ក្រៅពីជប៉ុន មានប្រទេស១៤ រួមទាំងកម្ពុជា ហ្វីលីពីន និងថៃ ព្រមទាំងអង្គការបី រួមទាំងអាំងទែរប៉ូល ចូលរួមកិច្ចប្រជុំនេះ។

ភាគីនានាបានចែករំលែកស្ថានភាពជាក់ស្តែងរបស់អង្គការឧក្រិដ្ឋកម្ម និងករណីដែលពួកគេបានស៊ើបអង្កេតបង្ក្រាប។

តាមទីភ្នាក់ងារនគរបាលជាតិ ចាប់ពីឆ្នាំមុនរហូតដល់ខែតុលាឆ្នាំនេះ ជនសង្ស័យសរុប១០៤នាក់ត្រូវបានចាប់ខ្លួន ពីបទសង្ស័យពាក់ព័ន្ធនឹងឧក្រិដ្ឋកម្មមានមូលដ្ឋាននៅអាស៊ីអាគ្នេយ៍ដែលផ្តោតលើជប៉ុន ដូចជាការឆបោកដោយក្លែងជាប៉ូលិស។

លោក Kusunoki បានថ្លែងថា ការខាតបង់ដោយការឆបោកនៅជប៉ុនឆ្នាំមុនបានឡើងដល់កម្រិតខ្ពស់បំផុត ប្រមាណ៣០០ពាន់លានយេន។ លោកបានអំពាវនាវថា ការឆបោកមានអង្គការចាត់តាំងជាបញ្ហាសំខាន់សកល ហើយចាំបាច់ត្រូវបង្កើតបណ្ដាញចាប់ឧក្រិដ្ឋជនទូទាំងពិភពលោក ដើម្បីកុំឱ្យពួកគេគេចផុតពីសំណាញ់ច្បាប់។