ប្រទេសកម្ពុជា ត្រូវបានរាយឈ្មោះជាប្រទេសរួសរាយរាក់ទាក់ជាងគេទី៥ លើពិភពលោក តាមការចេញផ្សាយពី Condé Nast Traveller 2025 Readers’ Choice Awards ដែលជាការបោះឆ្នោតប្រចាំឆ្នាំរបស់អ្នកអានទូទាំងពិភពលោក។
លទ្ធផលចំណាត់ថ្នាក់នេះ បញ្ជាក់ពីកេរ្តិ៍ឈ្មោះ និងភាពអស្ចារ្យនៃការទទួលភ្ញៀវរបស់ប្រជាជនកម្ពុជា ដែលតែងតែស្វាគមន៍ភ្ញៀវទេសចរយ៉ាងរួសរាយរាក់ទាក់ អំណោយអធ្យាស្រ័យ និងផ្តល់បទពិសោធន៍ដ៏ចងចាំក្នុងការធ្វើដំណើរទស្សនាប្រទេសកម្ពុជា។
ក្នុងបញ្ជីប្រទេសដែលត្រូវបានចំណាត់ថ្នាក់បន្ទាប់ពីកម្ពុជារួមមានប្រទេស វៀតណាម, ឈីលី និង ថៃ ជាដើម។
ការទទួលបានចំណាត់ថ្នាក់លើកនេះ បានបញ្ជាក់ម្តងទៀតពីភាពទាក់ទាញ និងកិត្តិយសរបស់ប្រទេសកម្ពុជា ក្នុងនាមជាគោលដៅទេសចរណ៍អន្តរជាតិ ដែលល្បីល្បាញដោយសារវប្បធម៌ជ្រាលជ្រៅ បេតិកភណ្ឌប្រវត្តិសាស្ត្រដ៏អស្ចារ្យ និងប្រជាជនដែលពោរពេញដោយភាពមេត្តា និងរួសរាយរាក់ទាក់។
ដោយ៖ ស្ថានីយទូរទស្សន៍ខេត្តព្រះសីហនុ
