ពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងប្រព្រិត្តិទៅនាពេលខាងមុខ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានមានប្រសាសន៍ឱ្យប្រព្រឹត្តទៅតាមប្រពៃណី ដោយផ្តោត សំខាន់លើការលេងល្បែងប្រជាប្រិយខ្មែរ និងការរក្សាវប្បធម៌ជាតិឱ្យកាន់តែរឹងមាំ។
សម្ដេចធិបតី បានលើកទឹកចិត្តឱ្យប្រជាពលរដ្ឋ និងអ្នករៀបចំកម្មវិធី បំផុសការលេងល្បែងប្រជាប្រិយ ខ្មែរឱ្យបានច្រើនដូចជា ល្បែងបោះអង្គញ លាក់កន្សែង ទាញព្រ័ត្រ និងល្បែងរបាំបុរាណផ្សេងៗ ដែលជាមរតកវប្បធម៌ដ៏មានតម្លៃរបស់ខ្មែរ។
ជាមួយគ្នានេះក៏មានការណែនាំឱ្យផ្អាកសកម្មភាពមួយចំនួន ដើម្បីរក្សាបរិយាកាសប្រពៃណីឱ្យកាន់តែសមរម្យ និងមានន័យជាងមុនដូចជា៖
- ផ្អាកការយកឡានទឹកមកបាញ់
- ផ្អាកលេងកាំភ្លើងបាញ់ទឹក
- ផ្អាកការផាតម្សៅ
វិធានការនេះមានគោលបំណងធ្វើឱ្យពិធីបុណ្យសង្រ្គានកាន់តែមានអត្តសញ្ញាណខ្មែរ បង្កើនភាពសប្បាយរីករាយតាមរយៈល្បែងប្រជាប្រិយ និងជួយបន្តអភិរក្សប្រពៃណី វប្បធម៌ជាតិឱ្យនៅគង់វង្សសម្រាប់ក្មេងៗជំនាន់ក្រោយ៕
អត្ថបទ ៖ ឡាយ កុល
