(ភ្នំពេញ)៖ ឯកឧត្តម វ៉ាង វិនប៊ីន ឯកអគ្គរដ្ឋទូតចិនប្រចាំកម្ពុជា បានលើកឡើងថា ចិនរីករាយក្នុងការពង្រឹងកិច្ចសហប្រតិបត្តិការប្រឆាំងអំពើពុករលួយជាមួយភាគីកម្ពុជា និងបង្កើតបរិយាកាសល្អសម្រាប់ការពង្រឹងកិច្ចសហប្រតិបត្តិការលើគ្រប់វិស័យរវាងចិននិងកម្ពុជា។
តាមបណ្ដាញទំនាក់ទំនងសង្គមហ្វេសប៊ុក នាយប់ថ្ងៃទី២៤ ខែសីហា ឆ្នាំ២០២៦ ឯកឧត្តម វ៉ាង វិនប៊ីន បានថ្លែងថា
លោកមានសេចក្តីសោមនស្សរីករាយណាស់ ដែលបានចូលរួមក្នុងពិធី បង្ហាញប្រគល់និងទទួលនូវសម្ភារៈការិយាល័យ ដែលជាអំណោយរបស់ស្ថានទូតចិនប្រចាំកម្ពុជា ចំពោះអង្គភាពប្រឆាំងអំពើពុករលួយកម្ពុជា ជាមួយឯកឧត្តម កិត្តិនីតិកោសលបណ្ឌិត ទេសរដ្ឋមន្ត្រី ឱម យ៉ិនទៀង ប្រធាន អង្គភាពប្រឆាំងអំពើពុករលួយកម្ពុជា។
ជាមួយគ្នានេះ ឯកឧត្តម ឯកអគ្គរដ្ឋទូត បានគូសបញ្ជាក់ថា «ភាគីចិនរីករាយក្នុងការពង្រឹងកិច្ចសហប្រតិបត្តិការប្រឆាំងអំពើពុករលួយជាមួយភាគីកម្ពុជា និងបង្កើតបរិយាកាសល្អសម្រាប់ការពង្រឹងកិច្ចសហប្រតិបត្តិការលើគ្រប់វិស័យរវាងចិននិងកម្ពុជា»៕
ដោយ៖ ធី លីថូ
