ចិនពង្រីកឥទ្ធិពលកងទ័ពជើងទឹក! ត្រៀមបញ្ចេញនាវាផ្ទុកយន្តហោះទី ៤ នៅឆ្នាំ ២០២៧ ខាងមុខ

នាវាផ្ទុកយន្តហោះទី ៤ របស់ប្រទេសចិន ដែលត្រូវបានគេជឿជាក់ថាជានាវាដំណើរការដោយថាមពលនុយក្លេអ៊ែរដំបូងបង្អស់ អាចនឹងសម្ពោធឲ្យដំណើរការនៅឆ្នាំ ២០២៧ ឬដើមឆ្នាំ ២០២៨ ខាងមុខនេះ នេះបើយោងតាមការវាយតម្លៃចុងក្រោយពីមជ្ឈមណ្ឌលសិក្សាយុទ្ធសាស្ត្រ និងអន្តរជាតិរបស់សហរដ្ឋអាមេរិក។ កាលបរិច្ឆេទនៃការប្រកាសសម្ពោធឲ្យដំណើរការនាវាថ្មីនៅឆ្នាំ២០២៧ នេះ គឺចំពេលនឹងខួប ១០០ ឆ្នាំនៃការបង្កើតកងទ័ពរំដោះប្រជាជនចិន ដែលជាពេលវេលាប្រវត្តិសាស្ត្រមួយ ដែលទីក្រុងប៉េកាំងតែងតែប្រកាសបង្ហាញពីសមិទ្ធផលបច្ចេកវិទ្យាយោធាកំពូលៗរបស់ខ្លួន។ ផ្អែកតាមរូបភាពផ្កាយរណបដែលថតបានក្នុងខែតុលានេះ បង្ហាញថានាវា Type 004 កំពុងសាងសង់នៅក្នុងរោងចក្រ Dalian ភាគឥសានប្រទេសចិន ដោយមានប្រវែងប្រមាណ ៣២២ ទៅ ៣២៧ ម៉ែត្រ និងទទឹង ៤៦ ម៉ែត្រ ដែលស្មើនឹងទំហំនៃនាវាផ្ទុកយន្តហោះធំបំផុតរបស់កងទ័ពជើងទឹកអាមេរិក។ នាវា Type 004 ត្រូវបានរំពឹងថានឹងបំពាក់ប្រព័ន្ធជើងទម្របាញ់បញ្ជូនយន្តហោះចម្បាំងដោយកម្លាំងអេឡិចត្រូម៉ាញ៉េទិច និងប្រព័ន្ធថាមពលនុយក្លេអ៊ែរ ដែលជួយឱ្យនាវាអាចធ្វើប្រតិបត្តិការបានយូរ និងឆ្ងាយពីដែនទឹករបស់ខ្លួន។ យោងតាមរបាយការណ៍ពីមន្ទីរប៉ង់តាហ្គូនបានប៉ាន់ប្រមាណថា ចិនមានគោលដៅបង្កើតនាវាផ្ទុកយន្តហោះរហូតដល់ ៩គ្រឿងត្រឹមឆ្នាំ ២០៣៥ ខាងមុខ៕ អត្ថបទ៖ រិទ្ធី