សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានពន្យល់ថា ការការពារទឹកដី និងប្រជាជនអាចប្រើរយៈពេលវែង ស្មុគស្មាញ និងលំបាក ប៉ុន្តែរាជរដ្ឋាភិបាលនៅតែប្តេជ្ញាចិត្តក្នុងការការពារទឹកដី និងប្រជាជនគ្រប់ពេលវេលា។ សម្តេចធិបតីថ្លែងដូច្នេះ នៅក្នុង“ពិធីសំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត៣” នៅព្រឹកថ្ងៃអង្គារ ទី១០ ខែកុម្ភៈ ឆ្នាំ២០២៦នេះ។
ពាក់ព័ន្ធនឹងបញ្ហាជម្លោះព្រំដែន សម្តេចធិបតី បានលើកឡើងថា កម្ពុជាមិនចង់ឃើញ និងមិនចង់បាននោះទេ។ ផ្ទុយទៅវិញ កម្ពុជាចង់អភិវឌ្ឍន៍សេដ្ឋកិច្ច និងទំនាក់ទំនងជាមួយប្រទេសជិតខាងនៅតាមតំបន់ព្រំដែន។ ប៉ុន្តែទោះបីជាយ៉ាងណា សភាពការណ៍ដែលកើតឡើងក្នុងពេល ៦ខែនេះ គឺយើងអត់ជម្រើស ហើយអ្វីដែលរដ្ឋាភិបាលធ្វើបានគឺធានាសុវត្ថិភាព និងសេចក្តីសុខឱ្យប្រជាពលរដ្ឋ ដោយមិនទុកពួកគាត់ចោលនៅតំបន់ដែលកំពុងផ្លោងគ្រាប់នោះទេ។
មិនតែប៉ុណ្ណោះ សម្តេចធិបតីនាយករដ្ឋមន្រ្តី បានបញ្ជាក់បន្ថែមថា «យើងមិនចង់ឱ្យស្ថានភាពនោះកើតមាន២៦ ២៧ ២៨ ឡើយ ដោយចង់ឱ្យក្មួយ គឺសាលាខូច ជួសជុលវិញហើយអាចត្រឡប់ទៅរៀនវិញបាន។ ក្មួយកំពុងរៀនមិនត្រូវការរត់ភ័យខ្លាច ដោយសារឮសំឡេងយន្តហោះទម្លាក់គ្រាប់បែក និងកាំភ្លើងធំមកនោះទេ»។
សម្តេចធិបតី ហ៊ុន ម៉ាណែត បានសង្កត់ធ្ងន់ថា៖ «នេះគឺជាគោលដៅរបស់យើងក្នុងការការពារទឹកដី និងការពារប្រជាជនក្នុងពេលជាមួយគ្នា អាចប្រើរយៈពេលវែង អាចស្មុគស្មាញ និងលំបាក ប៉ុន្តែរាជរដ្ឋាភិបាលមិនថា រយៈពេលវែងណា ស្មុគស្មាញយ៉ាងណា រាជរដ្ឋាភិបាលនៅតែប្តេជ្ញាចិត្តក្នុងការការពារទឹកដី និងប្រជាជនគ្រប់ពេលវេលាទាំងអស់»៕
ដោយ៖ ង៉ែត ពិសាន្ត
