យោងតាមសេចក្តីប្រកាសព័ត៌មានដែលក្រសួងការបរទេស និងសហប្រតិបត្តិការអន្តរជាតិកម្ពុជាបានចេញផ្សាយនៅព្រឹកថ្ងៃទី១១ ខែវិច្ឆិកា ប្រធានាធិបតីរវ៉ាន់ដា លោក ផូល ខាហ្គោម៉េ នឹងបំពេញទស្សនកិច្ចផ្លូវរដ្ឋនៅកម្ពុជានាថ្ងៃទី១៣ ខែវិច្ឆិកា តបតាមព្រះរាជអញ្ជើញរបស់ព្រះមហាក្សត្រកម្ពុជា ព្រះបាទ នរោត្តម សីហមុនី និងចូលរួមកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាធ្វើជាម្ចាស់ផ្ទះ។
សេចក្តីប្រកាសព័ត៌មានបានឱ្យដឹងថា ក្នុងអំឡុងទស្សនកិច្ច លោកប្រធានាធិបតី ខាហ្គោម៉េ នឹងចូលគាល់ព្រះបាទ សីហមុនី នៅព្រះបរមរាជវាំង ហើយនឹងជួបដាច់ដោយឡែកជាមួយប្រធានព្រឹទ្ធសភា ហ៊ុន សែន ប្រធានរដ្ឋសភា ឃួន សុដារី និងនាយករដ្ឋមន្ត្រី ហ៊ុន ម៉ាណែត។ ភាគីទាំងពីរនឹងផ្លាស់ប្តូរយោបល់អំពីការពង្រឹងទំនាក់ទំនងទ្វេភាគីកម្ពុជា-រវ៉ាន់ដា និងការពង្រីកកិច្ចសហប្រតិបត្តិការលើវិស័យនានា។
បន្ថែមពីនេះ ប្រទេសទាំងពីរនឹងចុះហត្ថលេខាលើកិច្ចព្រមព្រៀង និងឯកសារសហប្រតិបត្តិការមួយចំនួនក្នុងអំឡុងទស្សនកិច្ច ដែលគ្របដណ្តប់លើវិស័យពាណិជ្ជកម្ម វិនិយោគ អាកាសចរណ៍ និងទេសចរណ៍។ បន្ទាប់ពីចុះហត្ថលេខា ឯកសារទាំងនេះនឹងផ្តល់សន្ទុះថ្មីដល់ទំនាក់ទំនងកម្ពុជា-រវ៉ាន់ដា ជំរុញការផ្លាស់ប្តូរពាណិជ្ជកម្ម និងសេដ្ឋកិច្ចរវាងប្រទេសទាំងពីរ និងបើកឱកាសថ្មីសម្រាប់កិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក។
