ប៉េកាំង៖ ប្រទេសចិនកំពុងបន្តបង្ហាញសមត្ថភាពយោធាដ៏ទំនើបរបស់ខ្លួន ដោយយន្តហោះប្រយុទ្ធជំនាន់ទីប្រាំ Chengdu J-20 ឬដែលគេស្គាល់ថា “Mighty Dragon” ក្លាយជាឧបករណ៍សំខាន់មួយក្នុងការពារដែនអាកាសនិងបង្កើនឥទ្ធិពលយោធារបស់ចិននៅតំបន់អាស៊ី។
យន្តហោះ J-20 ត្រូវបានផលិតដោយក្រុមហ៊ុន Chengdu Aerospace Corporation ស្ថិតក្រោមក្រុមហ៊ុន AVIC (Aviation Industry Corporation of China)។ វាហោះលើកដំបូងនៅថ្ងៃទី ១១ មករា ឆ្នាំ ២០១១ ហើយបានបញ្ចូលប្រើជាផ្លូវការនៅក្នុងកងទ័ពអាកាសចិន (PLAAF) ចាប់តាំងពីឆ្នាំ ២០១៧ មកម្ល៉េះ។
បច្ចុប្បន្ននេះ J-20 ត្រូវបានគេចាត់ទុកថាជា យន្តហោះ stealth fighter ជំនាន់ទី ៥ ដំបូងបង្អស់ដែលផលិតដោយប្រទេសអាស៊ី។ វាត្រូវបានរចនាឡើងដើម្បីប្រឆាំងនឹងយន្តហោះអាមេរិកជំនាន់ថ្មីដូចជា F-22 Raptor និង F-35 Lightning II។
យន្តហោះ Chengdu J-20 មានប្រវែងប្រហែល ២០ម៉ែត្រ, ទទឹងស្លាបប្រហែល ១៣ម៉ែត្រ, ហើយអាចហោះបានល្បឿនដល់ Mach 2 (ប្រហែល ២,៤០០គីឡូម៉ែត្រក្នុងម៉ោង)។
វាត្រូវបានបំពាក់ដោយម៉ាស៊ីន WS-10C ឬ WS-15 ជាប្រភេទថ្មីដែលអាចផ្តល់ថាមពលខ្ពស់ និងអនុញ្ញាតឲ្យហោះបានឆ្ងាយប្រហែល ១,២០០ ដល់ ២,០០០គីឡូម៉ែត្រ។
អាវុធដែលមានរួមមានមីស៊ីលប្រឆាំងយន្តហោះប្រភេទ PL-10 និង PL-15, ត្រូវបានដាក់នៅក្នុងផ្ទៃក្នុង (Internal Weapons Bay) ដើម្បីរក្សាការស្ងៀមស្ងាត់របស់សញ្ញារ៉ាដា។
J-20 ត្រូវបានរចនាឡើងសម្រាប់បំពេញភារកិច្ចប្រយុទ្ធលើអាកាស (air superiority) និងការបំបែកប្រព័ន្ធការពារពីអាកាសរបស់សត្រូវ។ វាអាចប្រើក្នុងការបាញ់ទម្លាក់យន្តហោះដឹកនាំ (AWACS) ឬយន្តហោះបញ្ជា និងសមត្ថភាពបញ្ចូលប្រើប្រព័ន្ធ sensor fusion និង AI flight control ដែលជួយឲ្យអ្នកបើកយន្តហោះគ្រប់គ្រងស្ថានភាពបានលឿន និងមានប្រសិទ្ធភាពខ្ពស់។
ការរីកចម្រើននៃ J-20 បង្ហាញពីសមត្ថភាពបច្ចេកវិទ្យាដ៏រឹងមាំ និងការអភិវឌ្ឍឯករាជ្យរបស់ចិនក្នុងវិស័យអាវុធអាកាស។ វាត្រូវបានគេចាត់ទុកថាជា “សត្វនាគ” ដែលតំណាងឲ្យអំណាច និងឆន្ទៈរបស់ចិនក្នុងការពារអាណាចក្រ និងបង្កើនឥទ្ធិពលយោធានៅលើឆាកពិភពលោក។
ប្រភព៖ Aviation Industry Corporation of China (AVIC), Global Times, Defense News
ដោយ៖ ទាវ វិឆាត
