ទំព័រហ្វេសប៊ុកមួយឈ្មោះថា កំសាន្តព័ត៌មាន បានផ្សព្វផ្សាយលើបណ្តាញសង្គមថា នៅថ្ងៃទី២៨ ខែតុលា ឆ្នាំ២០២៥ ទីតាំងប្រព្រឹត្តបទល្មើសល្បែងអនឡាញគ្រប់ប្រភេទមួយកន្លែងស្ថិតនៅភូមិពាលញែក សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ បើកដំណើរការយ៉ាងរលូន។ ជុំវិញនឹងករណីនេះ អធិការដ្ឋាននគរបាលក្រុងពោធិ៍សាត់ បានអះអាងថា កម្លាំងជំនាញបានចុះទៅដល់ទីតាំងហាងកាហ្វេនោះឃើញមានតែអ្នកមកផឹកកាហ្វេ និងអ្នកអង្គុយលេងអុកធម្មតាតែប៉ុណ្ណោះ។
កម្លាំងជំនាញសហការជាមួយកម្លាំងប៉ុស្តិ៍នគរបាលរដ្ឋបាលផ្ទះព្រៃ រកមិនឃើញមានឧបករណ៍ ឬសម្ភារៈប្រើប្រាស់ណាមួយពាក់ព័ន្ធនឹងល្បែងស៊ីសងអនឡាញនៅទីតាំងខាងលើនោះទេ។ មិនតែប៉ុណ្ណោះ សមត្ថកិច្ចជំនាញ ក៏បានធ្វើកិច្ចសន្យាអប់រំ និងបានធ្វើការផ្សព្វផ្សាយអំពីផលប៉ះពាល់ពាក់ព័ន្ធនឹងការប្រព្រឹត្តបទល្មើសល្បែងស៊ីសងអនឡាញជាមួយម្ចាស់ហាងនោះ កុំលួចបង្កប់ ឬបើកទីតាំងពាក់ព័ន្ធនឹងល្បែងស៊ីសងអនឡាញ។ ក្នុងករណី សមត្ថកិច្ចរកឃើញទីតាំងខាងលើពិតជាមានការពាក់ព័ន្ធនឹងល្បែងស៊ីសងអនឡាញ នោះម្ចាស់ទីតាំងនឹងត្រូវទទួលខុសត្រូវចំពោះមុខច្បាប់។ យ៉ាងណា ករណីនេះ សមត្ថកិច្ចកំពុងបន្តការស្រាវជ្រាវ និងស៊ើបសង្កេតទៀតផងដែរ។ នេះបើតាមការបញ្ជាក់បន្ថែមនៅក្នុងសេចក្តីបំភ្លឺព័ត៌មានរបស់អធិការដ្ឋាននគរបាលក្រុងពោធិ៍សាត់៕
ស្ថានីយទូរទស្សន៍ខេត្តព្រះសីហនុ ដោយ៖ ង៉ែត ពិសាន្ត
